嚟過我哋尖沙咀分店嘅朋友都知道其中一大特色就係所有啤酒都放晒喺雪櫃入面，除咗方便大家即買即飲之外，仲可以延長啤酒嘅壽命。
但偏偏有好多客人嚟到我哋尖沙咀店買嘢嘅時候都會問我哋：「唔該呢支有冇唔凍架？」
佢哋話除咗驚啲倒汗水會整濕其他嘢之外，更加擔心返屋企嘅旅程又凍又熱會影響佢哋嘅味道。
忽冷忽熱好多時都的確唔係好事嚟嘅，但係對於啤酒又係咪咁呢？
要搵出答案，首先要知道啤酒嘅敵人。第一個係時間，大部份嘅啤酒都係越新鮮越好飲，因為放耐咗唔會失去咗一啲香味，尤其是啤酒花嘅香味，例如以啤酒花味道為主要特色嘅IPA就一定要新鮮咁飲。
第二就係氧氣，啤酒氧化之後會產生好似紙皮咁嘅陳舊味道，令到味道幾豐富嘅啤酒都變得了無生氣。配合入樽封罐技術進步，酒廠已經盡力減少包裝入面嘅氧氣，可惜都總係無法完全避免氧化問題。
第三就係熱力，因為上述兩個令啤酒味道面目全非嘅過程都會被高溫加速，簡單嚟講就係越熱啤酒就死得越快。
消費者可以自己選擇新鮮嘅啤酒，酒廠就努力減少氧氣接觸，而避免啲啤酒被高溫虐待就係批發商同零售商嘅責任喇。所以有時明明係同一個牌子嘅酒喺唔同地方飲味道有好大出入的話，好可能就係運輸或者存放嘅過程出咗問題。
返返正題先，既然啤酒要避免高溫存放，放喺雪櫃就梗係最好啦。但係如果喺雪櫃拎咗出嚟放到室溫又雪返咁樣又冷又暖重複幾次又會點呢？無論係人啦，凍肉啦，雪糕啦，甚至係整緊啤酒嘅酵母都唔鍾意忽冷忽熱。不過大家可以放心，啤酒就無上述幾樣嘢咁敏感嘅，只要你保持住啲啤酒嘅溫度唔好太高（低過攝氏21度），溫度變化對啤酒嘅味道係唔會有太大影響。雖然重覆冷藏會令啤酒發生冷混濁(chill haze)而變得混濁一啲，但係只會影響外觀而唔會改變味道。
下次揀啤酒嘅時候記得留意下啲啤酒有冇被好好照顧，同埋唔使擔心拎支凍嘅走會無咁好飲喇！
