正當大家日日努力扮工都諗住幾時放工可以去Happy Hour飲返兩杯，有冇諗過，其實呢個世界有d人，日日返工嘅工作就係飲酒？
我絕對冇呃你。
近年流行精釀啤酒，令到全世界（包括香港）都好多精釀酒廠冒起。一d比較講究而大規模嘅酒廠，更加會聘請「啤酒試飲員」，確保出品質素同埋研發新口味。根據美國求職網站simplyhired.com，美國嘅啤酒試飲員平均年薪達到$61,008美元（約$473,000港元），最高10%年薪更加達到$111,646美元（約$866,000港元）。
問題係：點先可以有資格做呢份工？
要做啤酒試飲員，首先你要識飲。唔係講緊你飲咗廿年happy hour就算識飲，而係要識得飲得出唔同味道之餘，仲要可以提供建議點樣改善。
要提升呢方面嘅知識同技能（同埋考埋張香港人最緊張嘅沙紙），啤酒界有兩個專業資格可以考：BJCP 同 CCP。
Beer Judge Certification Program (www.bjcp.org)
BJCP 全名係Beer Judge Certification Program，係美國嘅一個非牟利機構。佢除咗出版咗現今最權威嘅啤酒分類指南之外，亦舉辦全球認受性最高嘅啤酒評審分級認可考試。只要成為認可啤酒評審，你就有資格喺全球大大小小BJCP認可嘅啤酒比賽度做評審。
不過講就容易，其實通過考試絕對唔簡單。首先你要對121種啤酒類型同釀酒步驟有一定認識，通過網上筆試。筆試合格之後，仲要參加品酒考試 － 現場試飲六款啤酒之後，分別從色、香、味等，對啤酒作出評價同建議。品酒有一定分數，就可以做到Recognized Judge，再累積足夠比賽評審經驗，你先可以成為Certified Judge。
做Certified Judge，固然可以增加你做「啤酒試飲員」嘅機會，但係就算你未打算轉行，做Certified Judge都有著數 - 因為亞洲區內而家Certified Judge都唔算多，所以做Certified Judge間唔中都會有其他國家嘅比賽主辦單位，願意出埋機票酒店邀請你去做啤酒比賽評審。係咪聽到心郁郁呢？
係咁就啱嘞。最近，香港有十幾位認可評審成立咗Hong Kong BJCP （www.hkbjcp.org），希望幫到更加多香港人認識精釀啤酒，甚至成為專業評審。我哋最近舉辦咗香港歷來第二次BJCP品酒考試，同埋BJCP 認可嘅第一屆Hong Kong and Macau Beer Cup。未來我哋每年會舉辦兩次BJCP品酒試（5月同11月），慢慢增加認可香港評審人數，從而提高香港啤酒比賽水平。
Cicerone Certification Program (www.cicerone.org)
CCP 全名係Cicerone Certification Program，一樣係來自美國，不過係牟利機構（所以價錢比較高）。
CCP 係一套專為餐飲業而設嘅認證考試，內容包括釀酒、品酒、侍酒嘅知識，仲有配襯食物、draft system管理等等課題。可以話，考到呢張沙紙代表你對精釀啤酒無論係飲定serve都有一定認識，就算你未必做到「啤酒試飲員」，喺現時間間餐廳／酒吧甚至超市都對craft beer趨之若鶩嘅時勢，拎住呢張沙紙絕對可以幫到你stand out。
Level 1 嘅認證叫Certified Beer Server，只需要完成一個相對容易嘅網上筆試就可以，只要你肯俾US$69考試費，溫少少書就可以考到；不過Level 2 - Certified Cicerone就唔同講法。除咗有短答、長文嘅筆試，仲要加埋現場侍酒考試，同埋品酒考試。
由於香港從來未舉辦過Level 2考試，所以雖然有25位Certified Beer Server，但係只有一位Certified Cicerone。好消息係，香港歷來第一次Level 2考試將會喺2017年1月17號舉行，而筆者我都報咗名，good luck to me!
