【釀酒師的故事．來自森林的禮物・𝐎𝐱𝐛𝐨𝐰創辦人 - 𝐓𝐢𝐦 𝐀𝐝𝐚𝐦𝐬】
Oxbow一字有「牛軛」、河流彎曲之處嘅意思。Oxbow Brewing Company嘅釀酒風格就好似彎彎曲曲嘅河流一樣，望落去迂迴曲折，好似行咗好多冤枉路；你可以選擇走捷徑，快啲到達終點，但咁急趕住去邊呢？好酒需要時間蘊釀，不如慢慢來、順住水流，一齊同Oxbow創辦人Tim Adams感受一下河流的潮起潮落啦！
選擇釀農舍啤酒，除咗係因為自釀出身嘅Tim非常欣賞呢個比利時酒款之外，亦都係因為呢種啤酒嘅可塑性：「部份傳統啤酒有好多原料、釀造程序上嘅規範；相比之下，農舍啤酒就無呢啲規範，比我哋有非常大嘅實驗空間。」從天然發酵、酒桶陳釀，以至將水果、蜂蜜入酒，喺Oxbow酒廠裡面，幾乎冇嘢係無可能。由Tim帶領嘅釀酒團隊將酒廠視為遊樂場，以現代、創新嘅釀酒方法試驗出與別不同嘅農舍啤酒。
Tim其中一個不能妥協嘅堅持，係要將呢個遊樂場設喺老家緬因州裡面嘅一個杳無人煙嘅森林。有唔少酒廠喺城市嘅工廈、貨倉裡面釀農舍啤酒，但阿Tim認為，「要叫自己做真正嘅農舍酒廠，點都要有個農莊同水井！」而Oxbow嘅啤酒絕對反映咗緬因州呢片農地同水源嘅特色——所有啤酒都用上當地嘅井水釀造；天然發酵同酒桶陳釀嘅啤酒都非常依賴酒廠嘅野生酵母同風土條件；入酒嘅水果、蜂蜜全部都來自當地果園、酒廠自設嘅養蜂場——Oxbow嘅啤酒，生於斯長於斯，無論係香氣同味道都散發住阿Tim描述嘅風土特色、同佢情有獨鍾嘅本土情懷。
要完全體驗Oxbow咁獨特鮮明嘅農舍啤酒風格，一定要去哂嚟緊三個Tap Takeover：𝗙𝗟𝗢𝗥𝗔——1月29號去 Second Draft 同農莊花草、蜜蜂玩遊戲；𝗙𝗨𝗡𝗞——2月5號去 Blue Supreme 體驗酒桶陳釀、野生酵母嘅風土滋味；𝗙𝗥𝗨𝗜𝗧——2月12號去 Moonkok 品嚐來自Oxbow果園的味道。快啲去呢度睇哂所有啤酒嘅資料啦！
