【釀酒師的故事 - 𝐌𝐚𝐭𝐭 & 𝐀𝐧𝐝𝐫𝐞𝐚 𝐇𝐨𝐮𝐠𝐡𝐭𝐨𝐧, 𝐁𝐨𝐚𝐭𝐫𝐨𝐜𝐤𝐞𝐫創辦人】
Matt開酒廠做嘅第一件事，就係用5000蚊澳幣買咗60個紅、白酒桶(嘩其實好抵！)。管數嘅老婆Andrea知道之後都打咗個突，問Matt：「喂家吓我哋係開酒莊定係開啤酒廠㗎？！」老公拍心口一句「信我啦！」就開展咗佢哋釀酒之途。
時至今日，創辦Boatrocker將近12年嘅Matt話釀啤酒最大嘅動力「係愛呀」！呢份愛源自1998年，Matt第一次去比利時神廠Cantillon試咗人生第一隻酸啤；自此佢不但愛上咗風格獨特嘅酸啤，更開始咗佢對酒桶嘅迷戀。佢話無論係咩風格嘅啤酒經過酒桶陳釀，都可以提升啤酒嘅複雜度同層次，仲話過桶呢家嘢簡直係一門藝術！
以剛喺Brewcraft上架嘅《𝐇𝐨𝐮𝐬𝐞 𝐑𝐞𝐝》為例，佢係一隻用咗索雷拉陳釀法(Méthode Solera)陳釀嘅法蘭德斯紅色愛爾(Flanders Red Ale)。索雷拉陳釀法(Méthode Solera)係指釀酒師會將陳釀咗不同年份嘅新舊酒混合，除咗可以保留舊酒嘅味道特色，亦都可以從新酒身上得到足夠養份，令酒繼續發酵熟成。
《𝐇𝐨𝐮𝐬𝐞 𝐑𝐞𝐝》混合咗Matt嚴選過、陳釀咗12、24同48個月嘅舊酒，務求將唔同時期嘅酒桶裡面嘅乳酸(Lactic Acid)、醋酸(Acetic Acid)、酒香酵母(Brettanomyces)調配至最佳水平。完成品不但充滿咗豐富嘅車厘子、紅莓既甜帶酸嘅果味，更帶有濃厚拖肥嘅麥芽味。
每一個酒廠、每一樽/罐啤酒背後都有佢哋嘅故事，小編同店長們都好鍾意聽呢啲故仔，聽完仲會覺得支酒好飲咗添！如果你同我哋一樣都咁鍾意聽故仔，就要follow實我哋，你哋嘅支持係我哋繼續努力嘅泉源！
#PowerToTheBeerDrinker
