自從精釀啤酒開始普及，市面上出現咗好多唔同種類嘅啤酒。最常見嘅其中一類，就係加入咗唔同味道嘅啤酒，例如芒果、紅莓、香蕉等等生果味，或者咖啡、朱古力、榛子味，甚至辣椒、花生醬、煙肉味都有。
所以上自釀啤酒堂，時不時都會有人問：「生果味啤酒係咪真係有生果㗎？」
對於呢個問題，最準確嘅答案係：「可能有，又可能冇。」
點解咁講？因為其實加唔同味道落啤酒，分咗三個主要方法：
1. 大酒廠／入門／低成本方法
第一個方法，係加essence（香精）。只要喺啤酒度加入士多啤梨味香精，自然就會變咗士多啤梨味。同平價雪糕、汽水、蛋糕、「果汁」一樣道理。
呢個方法有好多好處：成本低、容易操作、水準穩定。
如果你係一個釀酒新手，又有個朋友就嚟生日（即係冇失準空間），咁我會建議你用essence，可以確保啤酒有你要嘅味，又唔會有細菌令啤酒變味。
不過呢個方法出嚟嘅味道會好「假」好「人工」。如果你想提升，又有時間試驗，你可以晉級去方法二：
2. 精釀酒廠／高成本方法
第二個方法，係真係加入你要嘅材料。例如你要辣椒，就真係落d辣椒；要香蕉，就落條真香蕉。
呢個方法嘅好處，當然係原汁原味夠天然。
聽落，要香蕉落香蕉，簡單直接。但係事實係，要完美發揮香蕉嘅香味，要經過好多次試驗先有機會成功。你要考慮嘅包括：
落幾多香蕉先夠味又唔會太搶？會唔會燒／焗／曬乾過先入味d？
香蕉會唔會有菌？需唔需要煲？但係煲過會唔會變味？
香蕉有幾多糖？其中有幾多會發酵？
香蕉有冇礦物質／蛋白質？會點樣影響d水？
香蕉有冇油？
曾經，我冇乜點諗過呢d問題，就買個新鮮菠蘿嚟整菠蘿啤酒，結果支啤酒一開爆到上天花板，爆到我全身菠蘿啤酒，仲要酸嘅。
所以要用真材實料加味（尤其生果）真係唔簡單。不過做到嘅話，味道會明顯比香精優勝，例如Anchor 嘅 Mango Wheat、Mikkeller 嘅 Chipotle Porter、Magic Rock 嘅 Grapefruit Pale Ale，都係好出色嘅例子。
不過有d釀酒師仲可以進一步去到方法三：
3. 「分子料理」方法
有d廚師煮野食煮到出神入化嘅時候，會開始研究分子料理 - 即係「把食材的味道、口感、質地、樣貌完全打散，再重新『組合』成一道新菜」(Wikipedia)。
啤酒亦都一樣。有d人釀酒技術去到出神入化嘅時候，會開始將「味道」拆開：例如叉燒可以分為蜜糖、焦香、肉香；菠蘿油可以分為菠蘿皮（糖、蛋、豬油香）、牛油香、甜麵包香等等。
拆開咗之後，就可以逐一融入去啤酒裡面。例如用煙燻麥芽嚟做出煙燻味、用酒桶做出雲喱拿味、啤酒花做出菠蘿味等等。
其中一個經典嘅例子，係嚟自瑞典嘅Omnipollo 同英國酒廠Buxton合作推出咗一款叫Yellow Belly嘅「花生醬餅黑啤」。呢隻傳奇黑啤，一開花生味撲鼻，飲落係濃濃嘅花生、黑朱古力、雲喱拿味，口感醇厚幼滑，但係睇official 介紹就知，呢隻係 “A peanut butter biscuit stout with no biscuits, butter or nuts”，一粒花生都冇，真係唔到你唔服。純粹個人意見：呢支啤酒，一生總要試一次。
返嚟香港，本地酒廠黑鳶（Black Kite）亦都推出咗一款叫 “Oh, Bacon!” 嘅煙肉味啤酒，又係一開就明顯聞到煙肉嘅煙燻同楓糖，不過好明顯冇成條煙肉放落去釀啦。呢隻新穎嘅「分子料理」啤酒，早前仲贏咗2016年「香港國際啤酒獎」嘅「最佳本土釀製啤酒」，大家不妨一試。
睇咗咁大段嘢之後，以後有朋友問你「生果味啤酒係咪真係有生果㗎？」你知點答啦？
答案係：「睇label成份咪知囉。」
