【突破盲腸行動組・IBU究竟係乜東東？】
去酒吧睇酒單，或者睇啤酒招紙，有時都會見到「IBU」呢三個字母。究竟IBU係乜東東？IBU數值又點樣幫到大家揀啤酒？
IBU全寫係International Bitterness Units，係一個用嚟計算啤酒「苦度」嘅方法。喺釀酒過程中，煲熱咗啤酒花之後，裡面嘅α酸(alpha acid)會異構化、並溶解喺啤酒之中；而IBU就係計算啤酒裡面α酸異構物(iso-alpha acid)嘅水平。
簡單啲嚟講，IBU數值愈高，「理論上」隻啤酒會愈苦。
點解要強調係「理論上」呢？因為IBU只係一個化學上計算苦度方法，同真實感知苦度(perceived bitterness)未必相等。
IBU vs 感知苦度
感知苦度有幾高，可以受多個因素影響——例如甜味可以影響人對苦味嘅感知度。舉個例，一杯有60 IBU嘅黑啤，對比起只有50 IBU嘅淡愛爾(Pale Ale)，飲起上嚟可能反而係50 IBU嘅淡愛爾比較苦。因為黑啤裡面嘅麥芽甜味能夠平衡苦味，所以飲起嚟味道會冇淡愛爾咁苦。就好似煮嘢食咁，落多咗糖，自然味道會冇咁苦啦！
1000 IBU？
另外，人嘅味覺對於苦度嘅感知度有限，我哋實際上只能夠分辨到12 至 80 IBU左右，所以90 IBU嘅啤酒「理論上」比80 IBU苦啲，但實際飲起上嚟可能係差不多！
市面上亦有啲啤酒標榜IBU高達1000，但因為人體實在分辨唔到咁高IBU，所以對我哋嚟講，1000 IBU同100 IBU飲落可能係一樣——都係苦過弟弟😅！
IBU算式嘅漏網之魚？
除咗感知苦度之外，IBU都未必可以計算到其他影響啤酒苦度嘅因素！啤酒嘅苦味主要來自於啤酒花，但部份深色麥芽(例如黑麥)、香料其實都可以令啤酒變苦，但係IBU未必能夠計算在內。另外，冷泡啤酒花法(Dry-Hopping) 亦都可以喺唔製造α酸異構物(iso-alpha acid)嘅情況下令啤酒味道變苦。喺呢兩個情況之下，IBU就未必反映到啤酒真實嘅苦度啦！
有啲啤酒冇寫IBU嘅？
有時啤酒招紙上面冇寫到IBU，咁又係點解嘅呢？部分啤酒因為並唔係以啤酒花為主導（例如酸啤），所以IBU對呢啲啤酒嚟講並唔係最有用嘅資訊，所以部份酒廠會選擇唔寫出嚟。IBU主要係一個參考資料，唔同酒廠會有佢哋自己嘅原因選擇透唔透露IBU呢個資訊。
IBU究竟幫唔幫到手㗎？
睇到呢度你可能會問：IBU都唔完全反應隻啤酒苦唔苦，既然係咁，IBU咪唔係好幫到手？其實都唔係嘅！IBU數值可以令飲啤者有心理準備，知道杯啤酒有幾苦。對於一啲對苦度十分敏感嘅人，IBU可以幫到手，令佢哋揀啱適合佢哋飲嘅啤酒。
而行內亦有好多專業人士研究緊點樣令到IBU計算方法更加準確，所以假以時日，IBU有可能會更加幫到我哋去分辨啤酒嘅苦度！
我哋有幾個貼士可以比有興趣了解多啲關於IBU嘅你：
1. 認識唔同嘅啤酒酒款，了解吓不同酒款常用嘅麥芽同啤酒花種類、同佢哋嘅釀造過程
2. 試多啲唔同IBU嘅啤酒，體驗吓唔同原料、釀酒方法對啤酒苦度嘅影響
3. 同專業嘅酒吧、啤酒舖職員傾吓計，了解所賣嘅啤酒嘅感知苦度
做齊呢三樣嘢，儲多啲經驗，就自然會愈嚟愈識揀最啱自己嘅啤酒啦！
咦咪住，有咩辦法可以一次過做齊三樣嘢？報名參加我哋嘅自釀啤酒工作坊啦！又有得學釀酒，又有得試酒，又有專人講解啤酒知識，一次過滿足三個願望！
延伸閱讀：
- Last Call for IBUs: Fact, Fiction and Their Impact on Your Beer
- What's The Meaning Of IBU?
#PowerToTheBeerDrinker #HereForBeer #HKBrewcraft
