【突破盲腸行動組・女仔啤 vs 男人啤】
「有冇啲比女仔飲嘅啤酒㗎？」
「嘩呢隻啤酒比女仔飲就啱！」
「男人老狗點會飲呢隻啤酒㗎！」
又係Brewcraft出嚟幫大家突破盲腸嘅時間啦！究竟世上有冇「女仔啤酒」同「男人啤酒」之分嘅呢？
答案：係冇嘅！就好似食唔食辣一樣，飲咩類型嘅啤酒純粹係個人嘅喜好嚟，係唔關男定女事㗎！（小編識一位媽媽級人士，佢最鍾意就係飲黑啤，味道越濃越鍾意！）
每個人嘅味蕾都唔一樣，而且好多外在因素例如文化、飲食習慣、甚至現場環境都可以影響味覺嘅敏感度。用返食唔食辣做例子，要判斷一個人食唔食得辣，大家唔會問佢係男仔定女仔，反而會問佢平時有冇食開辣嘢，或者平時食米線食開BB辣、小辣定係大辣。飲啤酒亦都係一樣，有人會鍾意飲酸嘢，有人會鍾意飲味道較甘苦嘅啤酒，有人會鍾意麥味重啲、甜身啲嘅啤酒，大家嘅口味完全取決於個人喜好同飲食習慣，同性別唔係真係有好大關係。
除咗個人喜好同背景因素之外，現場環境都可以即時影響到當下味覺嘅敏感度。大熱天時，喺陽光猛烈嘅沙灘上，喺你面前嘅有兩杯啤酒：一杯係味道較淡、口感輕盈乾爽、酒精度4%嘅拉格(Lager)，另一杯係波本酒桶陳釀過、口感豐厚、酒精度10%嘅帝國世濤(Bourbon Barrel Aged Imperial Stout)，你會點揀？相信大家就算有幾鍾意帝國世濤都好，熱辣辣嘅天氣底下，點都會揀杯拉格嚟消吓暑、解吓渴嘅！喺呢個情況下，就唔係個人喜好嘅問題，反而真係關天氣同溫度事！
所以話，味覺呢家嘢其實比你想像中複雜，淨係用「女仔啤」或者「男人啤」嚟分辦唔同味道嘅啤酒其實唔係好幫到手！要搵到一隻最啱你飲嘅啤酒，不妨從你嘅個人喜好、飲食習慣、當下環境同情況入手。
咁大家應該點樣問或者講，先幫到酒吧或者舖頭嘅職員更準確介紹最啱你嘅啤酒呢？
⫸你平時飲開邊類型嘅啤酒？有冇啲例子？
⫸你鍾意飲「白啤」多啲定係黑啤多啲？味道想係濃啲定係淡啲？
⫸你有冇啲特別口味非常鍾意？例如有人好喜歡啤酒花嘅甘苦味，亦有人好鍾意飲加咗血橙嘅啤酒，或者有人無過桶啤酒（例如喺波本酒桶、紅酒桶陳釀嘅啤酒）不歡。
⫸今日天氣如何？熱辣辣？可以飲酸啤或者比較乾爽嘅啤酒。凍冰冰？可以飲酒精度高啲、較厚身嘅啤酒。
⫸如喺酒吧：呢杯係唔係你叫嘅第一杯啤酒？如果係嘅可以從較淡或者酸啤開始飲起。如果唔係嘅你上一杯飲咗咩？下一杯想飲啲類似嘅，定係想飲啲濃味啲、或者唔一樣味道嘅啤酒？
⫸如係買返屋企飲：會唔會配嘢食一齊飲？如果會，係配咩嘢食飲？海鮮？紅肉？會唔會有多幾個人可以分享大支啲嘅啤酒？
記得下次買/叫啤酒嘅時候，問一問自己以上嘅問題，咁就唔單止可以幫到職員揀最啱你嘅啤酒，仲可以開坧吓話題，同酒吧、舖頭職員做吓friend子添！
#PowerToTheBeerDrinker
