Blog

又到咗四年一度嘅全球盛事－世界盃！！足球同啤酒從來都係天生一對，想支持今屆16強嘅國家又應該飲咩啤？

法國
Brasserie De L'Être
大熱法國嘅紅白酒就係人都識，啤酒你又試過未？Brasserie De L'Être係少數嚟自巴黎嘅精釀啤酒，佢哋每個label都係由紋身師設計，夠晒獨特。除咗傳統嘅Saison同Tripel之外，佢哋都有IPA同埋Pale Ale架！

丹麥
Mikkeller & To Øl
呢個國家喺精釀界無人不識，全因Mikkeller同埋佢嘅徒弟To Ol。佢哋嘅啤酒絕對有趣過丹麥隊嘅比賽好多.......

瑞典
Omnipollo, Dugges, & Brekeriet
今屆最令人意外嘅莫過於衛冕冠軍德國被踢出局，而瑞典就喺果一組脫穎而出首名出線。佢哋嘅啤酒都同德國嘅傳統守舊可謂誓不兩立，連漢堡包薯條都可以用嚟釀酒再加埋雪糕一齊soft serve問你怕未。

比利時
Lambic & Trappist
比利時隊粒粒皆星應有盡有，就好似比利時著名嘅啤酒一樣要酸有Lambic, Flanders Red，要重口味有Quadrupel任君選擇。不過踢足球有星之餘都要講teamwork講夾唔夾，飲啤睇波都要照顧係波友嘅口味，新手嘅話就唔好逼人飲重口味喇。

英格蘭
Fuller's
無論潮流點變，英格蘭足球依然固我踢燒味足球一味靠斬。但係今屆就斬得勢如破竹，莫非係時候再攞冠軍？佢哋嘅啤酒亦係保持傳統，依然越舊越好飲。

日本
Hitachino & SanktGallen
日本足球同啤酒一樣，全靠向西方虛心學習先有今日嘅成果。當然佢哋亦不忘根，集各家大成之餘亦保留自己文化，值得其他亞洲「強」國借鏡。