最近有大廠出新款啤酒，電視廣告都唔止一款又請晒KOL賣植入式廣告，無論你鍾唔鍾意飲啤酒都無可避免會俾佢一而再再而三咁重複同一個字而洗咗腦 － 滑。既然佢講到啤酒要夠滑係咁緊要，咁我哋一於探討下點樣先可以釀到滑啲嘅啤酒啦！
啤酒嘅口感(Mouthfeel)同四大主要材料－麥芽、水、酵母同啤酒花都有關係，而滑唔滑呢一部份主要就係受麥芽同水影響：
麥芽
釀啤酒除咗主要用大麥之外，亦會用其他唔同嘅穀物，例如小麥，燕麥，裸麥甚至米同粟米。大廠可能會為咗慳錢而用平啲嘅材料取代大麥，但係精釀啤酒廠只會用佢哋嚟令啤酒更好飲，其中小麥同燕麥都可以令啤酒更順滑酒體更豐盈。例如Oatmeal Stout呢種風格嘅啤酒就係靠加燕麥令佢飲落更creamy，加埋深色麥芽嘅咖啡同朱古力味就直情好似Latte咁好飲。除咗上述材料之外，加乳糖(Lactose)都可以令啤酒更滑更有body。
水
啤酒有九成以上都係水，所以口感絕對離唔開用啲咩水嚟釀。不過水就冇話靚水核突水好水壞水嘅，除咗必須要乾淨之外，最重要嘅就係佢入面嘅礦物質。水入面嘅Sulphate-Chloride比例越低，釀出嚟嘅酒就越唔苦越smooth。就好似近期最紅嘅NE IPA之所以可以好似果汁咁有口感，就係靠用多啲chloride嘅水同埋加燕麥。咁係咪要特登搵啲唔知邊度雪山礦泉水返嚟釀?! 咁又唔使，其實調較水入面嘅礦物質比例超級簡單，大家係屋企釀酒都可以做到架～
啤酒嘅氣(carbonation)都係口感嘅一部分，低carbonation同細緻啲嘅泡沫可以令啤酒飲落無咁刺激性，自然順喉啲。如果釀好咗隻酒先至想後天補救？仲可以打氮氣嚟serve令佢更smooth，但係成本就高過淨係用二氧化碳喇。
至於用「創新」嘅「更長釀製成熟期」去令啤酒更幼滑就真係願聞其詳喇，可惜呢啲商業機密相信我哋呢啲凡夫俗子應該無乜機會可以一窺究竟。至於廣告之中另外提到嘅加夠兩次啤酒花連啤酒更有層次就唔同喇，唔單止唔係秘密，連初入門嘅homebrewer都知道唔同時候落啤酒花會有唔同層次嘅味道，dry-hopping(同隻酒dry唔dry無關係架，講緊係發酵好先落啤酒花)都已經係今時今日釀IPA嘅指定動作，唔知點解佢哋要研究再研究先發現到點樣可以釀到好飲啲嘅酒呢？
把口夠唔夠滑或者Marketing夠唔夠圓滑有幾重要我唔敢扮專家，我淨係知道廣告賣到天花龍鳳都好，啤酒都係用嚟飲嘅，飲落口先至係見真章。有幾多層次有幾滑？咁多資源咁多心力用嚟真係釀好酒定留返嚟度橋拍廣告？學佢哋話齋......
