1. 又酸又臭嘅，係咪變壞咗？／嘩咁苦嘅，涼茶嚟㗎？
精釀啤酒種類繁多，甜酸苦辣鹹嘅味道都有齊。如果唔想擺到落口先俾佢嚇一跳，叫之前就記得先了解下每一款酒嘅味道有咩特色。好多時酒吧嘅menu都會有簡單嘅介紹或者tasting note，做定功課就唔使驚唔啱自己口味喇。
其實就唔係咩啤酒都要冰凍咁飲嘅，唔同風格嘅啤酒都應該有相應嘅適飲溫度。太凍的話好多香味都散發唔到，太熱又會令汽泡走得更快，苦味亦無咁明顯，感覺無咁爽快。就算杯酒嚟到真係唔夠凍，都千祈唔好加冰去降溫，因為啤酒唔係烈酒，無諗住俾你溝淡嚟飲架...... 順帶一提，雪定啲杯好似好有誠意咁，但係其實完全無需要將啲酒keep住咁凍，冰杯上面嘅霜融咗之後仲可能會影響啤酒嘅味道架！
3. 咁多泡嘅，係咪呃錢架？
泡唔單止令啤酒更好睇，對啤酒嘅味道散發都有幫助。要斟到有個大小適中嘅Head，除咗要有技巧之外，一隻乾淨嘅杯都係好重要架。 
4. 啤酒都要斟出嚟飲，咁作狀架。
人類食到同飲到嘅味道其實有八成嚟自嗅覺，直接由樽／罐飲完全聞唔到香味，即係蝕咗八成嘅享受。斟出嚟飲除咗可以聞到香味之外，仲可以睇到佢嘅顏色，清澈度同埋有冇唔尋常嘅沉澱物，所以千祈唔好偷懶直接飲呀。當然都有例外嘅，例如神枱級嘅Heady Topper嘅釀酒師就建議直接由罐飲，唔好俾任何味道走甩；另外而家亦都有360°罐，一開就可以聞到又飲到，咁就一次解決晒所有問題喇。
5. 我想試下1號2號4號6號......
對住花多眼亂嘅選擇，試下味先揀都無可厚非嘅，不過一次叫晒全個menu嘅taster就未免有少少呃酒飲嘅嫌疑喇。如果好迷失唔知飲乜，可以搵根據自己嘅口味揀返一兩隻style嚟試下，或者問下店員有咩新鮮好介紹。
6. 我無醉!飲啦!!!(大叫)
輕嚐淺酌當然係賞心樂事，但係飲到貓晒就辛苦自己又影響到人又何苦呢？飲酒請量力而為，希望大家係欣賞精釀啤酒嘅味道同心思，而唔係只係為咗入面嘅酒精。
7. 咁多選擇都飲lager，識唔識飲架？
一句講晒「各人口味不同」，有人鍾意清清淡淡，貪佢平凡中見不平凡；有人鍾意刺激重口味，最好甜酸苦辣齊晒，一浪接一浪咁湧埋嚟。最緊要都係保持開放態度，同啤友分享討論唔同酒款有咩好飲，講到尾都係志在以啤會友啫～
8. 幾十蚊一支啤酒，咁咪賺死佢？
精釀啤酒無論係生產規模定係銷售網絡都同大牌子無法相提並論，加上精釀嘅態度就係唔可以為降低成本而犧牲品質，用料嘅份量同質素嘅要求都更高，價錢自然相差一截。記住你哋俾多少少買到嘅唔單止係更好飲嘅啤酒，仲係釀酒師嘅心血同埋對抗公式化產品嘅一種態度！
9. 生果啤？𡃁妹先飲架喎。／黑啤？好麻甩啫。
唔試過又點知咩口味先啱自己？為咗人哋點睇而限制自己嘅選擇，最後蝕底嘅都只係自己。
10. ......
唔識就問！精釀啤酒嘅文化最重要一環就係分享，唔識就問到識，未試過就試到啱為止！我哋唔怕俾你問到口啞啞，最怕就係你收收埋埋唔肯開口，怕醜嘅就飲返啖好啤壯壯膽先 :D
