咩係蜂蜜酒？
顧名思義，蜂蜜酒就係用蜂蜜釀出嚟嘅酒喇～
蜂蜜酒嘅英文係Mead，記住佢哋唔係honey beer或者honey wine呀。
酒嘅歷史源遠流長，而邊一種酒係出現得最早亦都眾說紛紜。啤酒同葡萄酒嘅fans都各自搵到唔同嘅論據支持自己，但係其實蜂蜜酒好大機會先至係最古老嘅發酵飲品。
首先蜂蜜係野生嘅，所以我哋食用蜂蜜嘅歷史比葡萄或者穀物呢啲農作物長。另外蜂蜜酒嘅釀造方法非常簡單，簡單到會自然發生，所以我哋嘅祖先好容易就會飲到甚至自己釀到蜂蜜酒。
又因為蜂蜜遍佈世界各地不受氣候同土壤影響，所以唔同嘅文明都發展出自己嘅蜂蜜酒文化同傳說。喺好多文化之中，蜂蜜酒都係眾神嘅飲品，因為佢嘅甜味非常可口，喺未有大量生產糖之前係非常難得嘅味道(唔似得我哋而家咩都加糖甜到膩)，亦因為採野生蜂蜜嘅產量有限，所以蜂蜜酒都係珍貴嘅奢侈品。最出名嘅有北歐神話，雷神Thor嘅爸爸Odin為咗偷飲蜂蜜酒，不惜化身凡人潛入巨人嘅山洞，飲完仲做埋詩歌之神。除咗北歐嘅維京人之外，希臘，俄羅斯，中國甚至埃塞俄比亞都有各自嘅蜂蜜酒，可見蜂蜜酒對古代文化係不可或缺嘅一部份。
點釀㗎？
蜂蜜酒究竟有幾易釀呢？只要你將蜂蜜用水稀釋，佢就會自然發酵做酒架喇!!! (唔信你試下) 大家可能都聽過蜂蜜係擺一萬年都唔會變壞，因為佢除咗係天然嘅抗生素之外，高糖濃度亦令細菌無法生長。但係其實蜂蜜入面係有好多細菌同野生酵母架，只要稀釋咗之後呢啲菌就會翻生，開始將蜂蜜入面嘅糖發酵。當然用細菌同野生酵母釀酒好難控制，釀出嚟嘅酒味道亦冇乜保證，所以我哋現代人係唔會用咁迷信靠運嘅方法釀酒嘅。我哋可以先將蜂蜜用熱水稀釋，咁就可以殺死佢本身帶有嘅細菌，然後再加入釀酒酵母，咁就可以確保釀出嚟嘅味道喺我哋掌握之中。除咗蜂蜜同水之外，仲需要補充番一啲酵母嘅營養，因為蜂蜜嘅成份基本上只有糖同水，欠缺酵母生長必須嘅氮。發酵嘅時間就視乎你用幾多蜂蜜同埋酵母嘅種類，短至一星期長至幾個月都有機會。
蜂蜜酒都有唔同種類？
正如啤酒同葡萄酒一樣，蜂蜜酒經過幾千年嘅演化之後都出現咗唔同嘅種類同風格。主要嘅分類方法係根據唔同嘅酒精濃度，甜度同埋添加材料:
低至高酒精濃度: hydromel < standard-strength < sack-strength
低至高甜度: dry < semi-sweet < sweet
添加材料: Cyser (蘋果)， Pyment (葡萄)，Berry Mead (各種莓類)，Melomel (其他水果)， Spiced Mead (各種香料)
除咗上述嘅種類之外，仲有你諗到諗唔到嘅材料都可以加入蜂蜜酒(例如朱古力，楓糖甚至海水)，又或者用唔同木桶去陳釀都可以為蜂蜜酒加添風味，就等大家發揮創意去創造更加多嘅味道喇～
邊度先有得飲？
基於材料本身比較貴限制較多，加上葡萄酒同啤酒強勢主導酒類嘅市場，蜂蜜酒時至今日都未有大規模生產嘅空間去同佢哋一拼。話雖如此，近年香港都開始吹起手工蜂蜜酒嘅風潮，例如世上數一數二嘅Superstition Meadery喺香港都可以買到，佢哋嘅Berry White系列長期佔據RateBeer蜂蜜酒嘅頭10名，就算喺佢哋嘅產地Arizona都係一支難求。平民化啲嘅選擇亦有英國嘅Gosnells，佢哋生產有氣低酒精度(~6% ABV)嘅蜂蜜酒為主，易入口又夠甜，味道同cider有啲相似，就連好多平時唔飲酒嘅客人都立即愛上。本地都有酒吧都有佢地自製嘅蜂蜜酒比大家試，見到記得唔好錯過呀！
認識過呢種歷史悠久又咁有新鮮感嘅酒之後，大家記住以後出街飲嘢有多個選擇喇！想學下自己喺屋企釀的話記住留意我哋Facebook，見到蜂蜜酒自釀班就趁早報名喇～
